في هذا المقال نقدم لكم ملاحظات ونصائح للصف الثالث الثانوي 2024 من خلال تجربتنا في الصف الثالث الثانوي 2021 و 2022 و 2023 ، 2024 وكيف تتعامل مع النظام الجديد ، وفي مقال اليوم هحاول اتكلم عن كل شئ يخص الصف الثالث الثانوي وهتكلم بشكل منفصل عن كل موضوع يخص الصف الثالث الثانوي .
ماهي أفضل طريقة للمذاكرة ؟
من وجهة نظري أفضل طريقة للمذاكرة على النظام الجديد هي انك تفهم كلمة موجودة في الكتاب وتحاول بقدر الإمكان انك تشوف معظم الحجات عملي لأن ده بيساعد في فهم الدرس بشكل أكثر دقة وتحديدا المواد العلمية.
حاول إنك متقعدش في الدرس كثير يعني انت خلصت درس حل عليه ومش شرط تحل مليار كتاب ، ممكن كتاب واحد هيكفي وهنتكلم في الموضوع ده تحت بالتفصيل ، بعد ما تحل على الدرس خش على طول على الدرس اللي بعده يعني متقعدش شهر ونصف في درس زي الدعامه في النبات هو بكثيره يومين ، يعني السنة اللي فاتت قعدنا شهر في درس الدعامه في النبات وفي الأخر جالنا منه سؤال واحد في الامتحان وممكن ميجيش منه أصلا فاللي عاوز اوصلهولك انك تحافظ على وقتك في حاجه مفيدة ، احنا ندمنا جدا على جو الخناقات في الأسئلة اللي ملهاش اي لازمه واللي مش بتيجي في الامتحان فحاول انك تبعد عن الاسئله اللي بره منهجك ، مش غلط انك تبحث على معلومه بخصوص منهجك ولكن الغلط انك تتعمق وفي الأخر هتتوه وهتتشتت جدا ومش هتعرف تذاكر الدرس خالص .
ما هو الأفضل اونلاين أم سنتر ؟
الموضوع ده بيختلف من شخص للثاني يعني مثلا في ناس بتحب الاونلاين وناس بتحب السنتر ، انت هتجرب الاثنين وشوف انهي حلو ليك ، ومن وجهة نظري ان الاونلاين أفضل لانه هيوفرلك وقت جامد جدا وهتبقى مركز وانت في البيت ولكن خلي بالك متراكمش حاجه عليك لأنك هتندم في الأخر
هل ممكن أعتمد على مدرسين اليوتيوب في الاونلاين بدل المنصة؟
الإجابة نعم ، اليوتيوب فيه مدرسين ممتازين جدا جدا وهيبقي عندك فرصه للحل الكثير ، لكن انا أُفضل إنك تأخذ دروس في المواد اللي بتحسها صعبه عليك يعني مادة محتاجه متابعة مع المدرس او بمعنى أصح مش هتعرف تذاكرها في البيت مع مدرس اليوتيوب او مع نفسك.
زي الإنجليزي مثلا أنا شائف انها مادة لازم تأخذ فيها بس انت ممكن تكون شاطر فيها متروحش وده بيعتمد عليك انت ، جرب وشوف اي الأفضل ليك .
أفضل المدرسين علي اليوتيوب ؟
ده ييعتمد عليك انت لأن كل طالب بيختلف عن الثاني ، يعني ممكن انا اكون بفهم من مستر كذا وصديقي مش بيفهم منه ده عادي هو يفضل يبحث لحد ما يلاقي
وانا هقولك أفضل المدرسين من وجهة نظري او اللي انا كنت بسمعلهم في ٣ث عاليوتيوب
عربي : أ/وليد محسن ، قناة فرائد لغوية.
كيمياء: أ/خالد صقر ، قناة كيمياء ثانويه عامة
فيزياء :أ/ محمود صلاح ، قناة Best physics , أ/محمد عبد المعبود
انجليزي: مستر هيثم كمال ، قناة إنجلشاوي
أحياء : أ/محمد صالح ، أ/ماجد مسعد السيد ، د/أحمد رضوان
جيولوجيا:قناة الأمان في الجيولوجيا، أ/ماجد إمام
لغه فرنسيه: قناة فرنشاوي ، قناة club du français facile Nermin Ezzat
بالنسبة لمدرسين المنصة قبل ما تشترك مع أي حد جربه وشوف بتفهم منه وبتحل معاه وبيديك افكار ولا لا وبتعرف تحل معاه وبيعمل امتحانات ولا لا وكل ده جربه وحسب فهمك أنت
هل لازم أشتري كتب خارجيه كثير ؟
الإجابة لأ مش لازم تجيب كتب خارجيه كثير ، دفعة 2021 و 2022 و 23 و 24 اشترت كمية كتب والحمدلله لسه بيضة كما هي ، يكفي كتاب واحد ولو هتزود هات كتابين أكثر من كده يبقي تبذير الصراحة
وهتغلط نفس غلطتنا وممكن تشوف افكار الكتب الللي بتنزل على قناتنا
طب أي أفضل الكتب الخارجية؟
عربي: كيان و الإبداع
كيمياء: شرح كتاب كيمياء ثانوية عامة، اسئلة مندليف ولو عاوز تزود في الأسئلة هات كمان كتاب وليكن التفوق أو الوافي
فيزياء: بصراحة انا شايف انك تجيب الامتحان اسئلة فقط لو حابب تزود هات نيوتن وممكن الوسام لو زودت اكتر
أحياء: الامتحان اسئلة ، لو عاوز تزود هات التفوق او المؤسس وحاول تبعد عن أي كتاب ببهبد
جيولوجيا: كتاب الامتحان ، الأول بعد كده ممكن كتاب التفوق
انجليزي: المعاصر يكفي، لو هتزود هات كتاب TOP أو كتاب جيم أو كتاب العمالقة
حاول تبعد عن الكتب اللي فيها اسئلة بره منهجك واللي فيه اسئلة هبد.
ملحوظة :
في ناس مش بيقي معاها فلوس تشتري غير كتاب واحد فده عادي برضوا وممكن يستخدموا الكتب PDF وهي بتنزل على قناة التليجرام الخاصة بنا للانضمام إليها | اضغط هنا |
أهم النصائح لطلبة ٣ث 2025
1- قرب من ربنا جامد ومتسيبش أي صلاة وأدعي ربنا كثير انه يوفقك
2- حاول إنك تلتزم في المذاكرة وتنظم وقتك بقدر الإمكان
3- في مواد انت لما بتيجي تحل فيها هتلاقي مشاكل فده طبيعي وانت بتقدر تتغلب على ده بأنك تحل اسئلة كثير وتاخد الثقه.
4- انت هتخلص الدرس وبعد كده تلخصه بمخطط او اي رسمه كويسه تكون شاملة الدرس.
5- حاول تذاكر من كتاب المدرسة وتحط فيه ملاحظاتك المهمه لأنك هتدخل بيه .
6- ابعد عن اي كتاب خارجي فيه اسئلة هبد أو بيطلع بره المنهج كثير.
7- حاول تبص على ملفات فيها افكار الدروس لانها هيفيدك جدا ودي بنعملها على الموقع وعلى قناة الدحيحة ملخصات ٣ث للانضمام إليها |اضغط هنا |
8- حاول تمتحن امتحانات الكترونيه كثيره لان دي هيفيدك برضوا وهتديك ثقة
9- اوعى تكره الخير لأي صديق ليك ، اي حد يطلب حاجه منك اديهاله.
10- ابعد عن الخناقات في الأسئلة اللي ملهاش اي لازمه لانها مش بتيجي في الامتحان.
وبكده أكون خلصت موضوع اليوم أتمنى أن أكون افدتكم ومتنسوش تصلوا على النبي صلى الله عليه وسلم.
تطبيق الدحيحة اختبارات ٣ث
اشترك ب 50ج فقط طول السنة جميع المواد اسئلة واختبارات ٣ث على النظام الجديد من جميع المصادر وكمان تفسير لأغلب الأسئلة، اشترك الآن من خلال الضغط على زر اشترك الآن وتواصل معنا.
اشترك الآن
بجد انا استفدت اوي من النصايح يجازيكم كل خير ❤.